गठबन्धनले माधव नेपाललाई पनि समेटेर संयुक्त वक्तव्य निकाल्ने

काठमाडौँ– सत्ता गठबन्धनले एकीकृत समाजवादीका अध्यक्ष माधव नेपाललाई पनि समेटेर संयुक्त वक्तव्य निकाल्ने भएको छ ।

अध्यक्ष नेपालले प्रधानमन्त्री पुष्पकमल दाहाललाई विश्वासको मत दिन र राष्ट्रियसभाको अध्यक्षमा गठबन्धनका उम्मेदवार नारायण दाहाललाई मत हाल्नका लागि लिखित सहमति खोजेपछि संयुक्त वक्तव्य निकाल्ने तयारी भएको हो ।

यसअघि आज बिहान प्रधानमन्त्री निवास बालुवाटारमा बसेको सत्ता गठबन्धनको बैठकले अध्यक्ष नेपालका कुराको सुनुवाइ गर्ने निर्णय गरेको थियो । गठबन्धनमा नेपालले कम्तीमा एक वर्ष प्रधानमन्त्री बन्ने लिखित प्रतिबद्धता समेत मागेका छन् । यसको पनि छलफल भएको छ ।

आफ्ना मागको सुनुवाइ हुने प्रतिवद्धतापछि एकीकृत समाजवादी माओवादी केन्द्रका राष्ट्रियसभा अध्यक्ष दाहाललाई सघाउन तयार भएको छ भने प्रधानमन्त्रीलाई पनि विश्वासको मत दिने निर्णय भएको अध्यक्ष नेपालको सचिवालयले जनाएको छ ।

पाँच दलीय गठबन्धनको सरकारमा एकीकृत समाजवादीका दुईजना मन्त्री छन् ।