वनमा आगो लगाएको अभियोगमा पाँचजना पक्राउ
![वनमा आगो लगाएको अभियोगमा पाँचजना पक्राउ](https://snowberry.prixacdn.net/media/gallery_folder/Jail-Logo_jEqLiYwycl_e9gi2nxkidxlolhfpyhqfihuojzovspdb2gfmpzbajv2yunu2syzcrmo923v_wXULxbCjli_drrlc25r1a316ddgohzouaeg8iuez1iqezucyxd4v7lghbqdyg44ov0h5wgr.jpg)
काभ्रे– वनमा आगो लगाएको अभियोगमा पाँचजना पक्राउ परेका छन् । काभ्रेको पाँचखाल नगरपालिका–५ रातमाटे सामुदायिक वनमा आगजनी गरेको अभियोगमा मण्डनदेउपुर नगरपालिका–११ का मैते तामाङ, विकास भुजेल र सविन सुनारलाई पक्राउ गरिएको जिल्ला प्रहरी कार्यालयका प्रहरी नायब उपरीक्षक राजकुमार श्रेष्ठले बताए ।
यस्तै, नमोबुद्ध नगरपालिका–१ को कासकोट सामुदायिक जङ्गलमा आगो लगाएको अभियोगमा ८० वर्षीय आइतीमाया तामाङ र चौँरीदेउराली गाउँपालिका–६ को आरुबोट सामुदायिक जङ्गलमा आगो लगाएको आशङ्कामा सोही वडाका ४९ वर्षीय लालकुमार सेन ठकुरीलाई नियन्त्रणमा लिइएको हो ।
पक्राउ परेका पाँचमध्ये नमोबुद्ध–१ का तामाङलाई हिरासतमुक्त गरिएको र अन्यलाई मुद्दा चलाइएको प्रहरीले जनाएको छ ।
डढेलो मानवबस्तीमा पस्दा रोशी, महाभारत र खानीखोला गाउँपालिकाका विभिन्न ठाउँमा धनमालको क्षति भएको छ । रोशी गाउँपालिका–४ सानोपोटा गाउँका १५ घर नष्ट हुँदा दुई करोड २६ लाख ३० हजार बराबरको क्षति भएको थियो ।
प्रतिक्रिया