जम्मु-कश्मिरमा भिडन्त, क्याप्टेनसहित ५ जना भारतीय सैनिक मारिए

नयाँ दिल्ली- जम्मु-कश्मिरमा पछिल्लो १० दिनमा ११ जना भारतीय सैनिक मारिएका छन् । मंगलबार मात्रै डोडास्थित डेसा जंगलमा भएको भिडन्तमा क्याप्टेनसहित ५ भारतीय सैनिक मारिएका हुन् ।

सेनाका जवानले चरमपन्थीहरूलाई जंगलमा घेरेर राखेको अवस्थामा भिडन्त भएको हो । चरमपन्थीहरूले आफूलाई बचाउन गोली चलाउँदा सेनातर्फ हताहती भएको भारतीय सञ्चारमाध्यमले जनाएका छन् ।

यसक्रममा भारतीय सेनाका जवानले पनि जवाफी फायरिङ गरेका थिए । उक्त भिडन्तका क्रममा एकजना क्याप्टेनसहित ५ जना सेना गोली लागेर मारिएका हुन् । घाइते सबैलाई अस्पताल लगिएको थियो । उपचारका क्रममा क्याप्टेनसहित ५ जनाले ज्यान गुमाए ।

ज्यान गुमाउनेहरूमा भारतीय सेनाका क्याप्टेन ब्रिजेश थापा, नायक डी राजेश तथा सिंपाहीहरू विजेन्द्र र अजय रहेका छन् ।

अहिले पनि उक्त जंगल इलाकामा सेनाले सर्च अपरेशन चलाइरहेको छ । सेनालाई जंगलमा चरमपन्थीहरू लुकिरहेको सूचना मिलेको थियो । सेनाले उनीहरूलाई ड्रोन र हेलिकोप्टरमार्फत खोजिरहेको छ ।

डोडाको डेसा जंगल इलाकामा भारतीय सेनाको युनिट राष्ट्रिय राइफल्सले जम्मु-कश्मिर पुलिसक स्पेशल अपरेशन ग्रुपसँग मिलेर खोजी अभियान चलाएको थियो ।

सोमबार साँझ ७ बजेदेखि राष्ट्रिय राइफल्स र एसओजीका जवान जंगलमा पसेर कारबाही थालेका थिए । सेनालाई त्यहाँ चरमपन्थी लुकेको सूचना आएको थियो ।

राति ९ बजे आसपास भएको भिडन्तमा भारतीय सेनातर्फ हताहती भएको हो । जंगलमा सेनाका जवान र चरमपन्थीबीच भिडन्त सुरु भएको थियो । यसक्रममा चरमपन्थीले धराप लगाएर सेनाका जवानमाथि गोली बर्साएका थिए । त्यसक्रममा गोली लागेका ५ भारतीय सैनिक मारिएका हुन् ।

डोडा इन्काउन्टरमा सेनाका जवानको ज्यान लिएको घटनाको जिम्मा चरमपन्थी संगठन कश्मिर टाइगर्सले लिएको छ ।

‘कश्मिर टाइगर्स’ले विज्ञप्ति निकालेर भारतीय जवानले ‘मुजाहिद्दिन’को खोजी अभियान थालेपछि जवाफी कारबाही गरेको जनाएको छ ।

यसअघि ८ जुलाईमा जम्मु-कश्मिरकै कठुआको बदनोटा इलाकामा सेनाको गस्ती टोलीमाथि हमला हुँदा ५ जना मारिएका थिए ।