सक्रिय राजनीति मार्फत जनताको सेवा गर्छु - बुढा

सुर्खेत - कर्णाली प्रदेशमा चर्चित स्वास्थ्यकर्मीको रूपमा स्थापित राजेश कुमार बुढाले करिब तीन दशक जागिरे जीवन बाट अलग्गै रहने घोषणा गरेका छन् । ऊनी अब सकृय राजनीतिमा लागेर जनताको सेवामा लाग्ने योजनामा छन् ।

वि.स २०२६ चैत्र १२ दैलेख महाबु गाउँपालिका वडा न.३ साबिक बासी गाविसमा जन्मिएका बुढाले वि.स २०४५ सालदेखि २०५३ सालसम्म ८ वर्ष मालिका निमावि शिक्षक भएर काम गरेका थिए।

पञ्चायत कालमा उनका बुवा मन बहादुर बुढा उपप्रधान थिए। पछि प्रजातन्त्र पुनर्स्थापना भएपछि नेपाली काङ्ग्रेस बासी गाविसको सभापति थिए । 

राजनीतिक परिवारमा हुर्केका राजेश बुढा वि.स२०४६ सिएमए क्याम्पस आन्दोलन तयारी समिति संयोजक भएर प्रजातन्त्र पुनर्स्थापनाको आन्दोलनमा सहभागी भएका थिए ।

स्वास्थ्यकर्मीका रूपमा आफू जन्मेको ठाँउमा निशुल्क उपचार गर्ने देखि वीरेन्द्रनगरमा विभिन्न समस्या पर्दा आफ्नो ठाउँका मान्छेलाई सहयोग गर्ने र बाटो देखाउने काममा बुढा सदैव सकृय छन् । 

नेपाली काङ्ग्रेसमा राजेश बुढाले प्रभावशाली छवि बनाउन सफल भएका छन् । स्वास्थ्यकर्मी संघ १५ वर्ष सुर्खेत जिल्ला अध्यक्ष, १ कार्यकाल कर्मचारी युनियन अध्यक्ष र हाल युनियनको केन्द्रीय सदस्य छन् ।

 

बुढा सङ हिमालयन म्यासेजले गरेको संक्षिप्त कुराकानी ।

 

तपाईंले हिजोमात्रै सरकारले उपनिर्वाचनको मिति तय गर्यो, सोहि दिन जागिरे जीवन छोड्ने घोषणा गर्नुभयो नि ?

मलाई यो सबै संयोग जस्तो लागिरहेको छ । मेरो भित्री इच्छा अब प्रत्यक्ष राजनीतिमा लागेर जनता सेवा गर्नुपर्छ भन्ने पहिल्यैदेखि थियो तर उपयुक्त समय जुर्‍यो । सबै भगवानको कृपा हो ।

गाउँ फर्किने योजना हो?

गाउँ फर्किने भन्ने प्रश्न रहेन, म सधै गाउँ सङ छु । प्रजातन्त्र पुनर्स्थापना पछि ८ वर्षसम्म गाउँमा अध्यापन गरे, आफ्नो विवेकले भ्याएसम्म गाउँका मानिसलाई रुपान्तरण गर्ने अभियानमा योगदान गरे । स्वास्थ्यकर्मीको रूपमा पनि गाउँको सेवा गरेको छु र गर्दै आएको छु । 

महाबु गाउँपालिका अध्यक्षको लागि उप-निर्वाचन हुदैछ नि?

हामीले परिपक्व हाम्रो अभिभावक गुमाउन पुग्यौ जुन दु:खद घटना थियो । उप-निर्वाचन स्वभाविक प्रक्रिया हो । मेरो दायित्व भनेको महाबुका जनतालाई जागरुक गराउने र समस्यामा परेका दाजुभाइ दिदीबहिनीको घाउमा मलम लगाउनु हो । मेरो बुवाले जसरी जीवनभर गाउँको सेवा गर्नुभयो , पञ्चायतलाई उपयोग गर्दै नेतृत्व गर्नुभयो र प्रजातन्त्र पुनर्स्थापनाका लागि समेत मलाई अग्रसर हुने प्रेरणा दिनुभयो , आज म त्यो जिम्मेवारी निर्वाह गर्न चाहान्छु । महाबुका जनताको सुख दुःखको सारथि बन्न चाहान्छु ।