रास्वपाको जिकिर- सहकारीबाट हराएको ८८ अर्ब जुत्ता पालिस गर्ने र मकै पोल्नेको होइन

काठमाडौं- राष्ट्रिय स्वतन्त्र पार्टीले देशभरका सहकाी संस्थाहरूबाट हरएको भनिएको ८८ अर्ब रुपैयाँका नाममा ‘इमोशनल ब्ल्याकमेलिङ’गरिएको बताएका छन् ।

आइतबार काठमाडौंमा पत्रकार सम्मेलनग गर्दै पार्टीका कार्यवाहक प्रवक्ता मनिष झाले मकै पोल्ने र जुत्ता पालिस गर्नेको ८८ अर्ब रुपैयाँ सहकारीबाट अपचलन भएको भनेर ‘इमोशनल ब्ल्याकमेलिङ’ गरिएको जिकिर गरेका हुन् ।

सहकारी ठगीसम्बन्धी छानबिनका लागि नेकपा एमालेका सांसद सूर्यबहादुर थापा क्षत्री संयोजकत्वमा बनेको संसदीय छानविन विशेष समितिले प्रतिवेदनमा औंल्याएको ८८ अर्ब रुपैयाँ हिनामिनाबारे रास्वपाले नयाँ जिकिर गरेको हो ।

झाले सहकारीबाट हराएको भनिएको ८८ अर्बमध्ये ८५ अर्ब रुपैयाँ राजनीतिक नेताहरूले गरेको भ्रष्टाचारबाट आएको दाबी गरेका छन् । उनले एक-दुई अर्ब रुपैयाँ मकै पोल्ने र जुत्ता पालिस गर्नेको पनि हुनसक्ने बताउँदै बाँकी भ्रष्टाचारबाट आएको जिकिर गरेका हुन् ।

‘सहकारीको ८७ अर्ब रुपैयाँ अपचलन भएको भन्ने छ । तपाईंहरूलाई लाग्छ कि त्यो सबै मकै पोल्ने र जुत्ता पालिस गर्नेको पैसा हो ? होइन नि,’ झाले भने, ‘त्यो त राजनीतिक भ्रष्टाचारको पैसा हो ।’

पुराना पार्टीका नेताहरूले कालो धनको पैसा लुकाउन सहकारी प्रयोग गरेको दाबी गरे । स्रोत खोल्नु नपर्ने भएकाले त्यो पैसा सहकारीमा हालिएको उनको तर्क छ । सहकारीमा हालिएको एक करोड रुपैयाँ बढी रकम भ्रष्टाचारीको भएको दाबी झाले गरेका छन् ।

उनले एक करोडभन्दा बढी पैसा सहकारीमा बचत गर्दा स्रोत खुलाउनुपर्ने नियम ल्याउन पनि सरकारलाई भनेका छन् ।

पत्रकार सम्मेलनमा झाले आन्दोलनका एजेण्डा सुनाउँदै सभापति रवि लामिछानेलाई हिरासतबाहिर राखेर अनुसन्धान गर्न माग गरेका छन् ।

उनले सहकारी पीडित र मिटरब्याज पीडितलाई न्याय दिनुपर्ने, उच्च ओहदामा रहेका सबैको सम्पत्ति छानबिन गरी सार्वजनिक गर्नुपर्ने माग पनि गरेका छन् ।

भ्रष्टाचारकाण्डको न्यायिक छानबिन गर्न स्वतन्त्र न्यायिक आयोग गठन गर्नुपर्ने, संविधान परिमार्जनका लागि सर्वपक्षीय सम्मेलन आयोजना लगायत एजेण्डा आफूहरूको रहेको झाले बताएका छन् ।

पहिलो र दाश्रो मिलेर बनेर बनेको सरकारले देश र जनताका लागि केही काम गर्न नसकेको आरोपसमेत उनले लगाएका छन् । रास्वपाले उपनिर्वाचनको मनोनयनमा आफ्ना पार्टीका उम्मेदवारमाथि आक्रमण प्रयास भएकाले निष्पक्ष हुनेमा आशंका जनाएको छ ।