रौतहटमा स्कार्पियो दुर्घटना, ८ जनाको मृत्यु

काठमाडौं– रौतहटको चन्द्रनिगाहपुरमा स्कार्पियो दुर्घटना हुँदा ८ जनाको मृत्यु भएको छ। घटनामा  पाँचजना घाइते भएका छन् ।

बाराको पाँचवर्षे गढीमाई मेलाबाट सिरहातर्फ जाँदै गरेको बा १६ च ३१६२ नम्बरको स्कर्पियो चन्द्रनिगाहपुर–४ स्थित पूर्वपश्चिम राजमार्गमा रुखमा ठोक्किएर दुर्घटना भएको प्रहरीले जनाएको छ । तीव्र गतिमा गुडेको स्कार्पियो सडक छाडेर जंगलतर्फ मोडिएको थियो ।

रौतहट प्रहरीका अनुसार मृत्यु हुनेमा सिरहाको अर्नामा गाउँपालिका– ३ का ६० वर्षीया लरुवदि देवी महरा, ३० वर्षीया उर्मिलादेवी महरा, ५० वर्षीया रामकुमारी देवी महरा, ५५ वर्षीया महङ्गी देवी महरा, ६२ वर्षीया फुलबन्ती देवी चमार, ६० वर्षीया रामकुमारी देवी महरा, ३० वर्षीया सकुन्तला देवी महरा र स्कार्पियो चालक ४० वर्षीय शिव कुमार यादव रहेका छन्।

शव चन्द्रनिगाहपुरस्थित सिभिल अस्पतालमा राखिएको छ। घाइतेको वीरगञ्जस्थित बयोधा अस्पतालमा उपचार भइरहेको छ।