जिपी कोइराला उपचार केन्द्रलाई विशिष्टिकृत अस्पताल बनाउँछौँ : मन्त्री पौडेल

 तनहुँ - स्वास्थ्य तथा जनसङ्ख्यामन्त्री प्रदीप पौडेलले जिपी कोइराला श्वासप्रश्वास उपचार केन्द्रलाई श्वासप्रश्वासको विशिष्टिकृत अस्पताल बनाउन लागिएको बताएका छन् । 

तनहुँको शुक्लागण्डकी नगरपालिका–५ बेलचौतारास्थित जिपी कोइराला श्वासप्रश्वास उपचार केन्द्रमा स्थापना गरिएको जिपी लायन्स डायलासिस केन्द्रको आज उद्घाटन गर्दै मन्त्री पौडेलले यो अस्पताललाई विशिष्टिकृत अस्पताल बनाउन सकिए नेपाल बाहिरबाट पनि उपचारका लागि मानिसहरू आउने बताए । 

मन्त्री पौडेलले डायलासिस उपचार सेवा वापत अस्पतालले सरकारबाट  दुई हजार पाँच सय अनुदान प्राप्त गर्ने बताए। नेपालको स्वास्थ्य क्षेत्रमा लायन्स क्लबले ठूलो सहयोग गरेको भन्दै सामाजिक उत्तरदायित्वमा क्लबको भूमिका प्रशंसनीय रहेको उल्लेख गरे । अस्पताललाई ३०० शय्या क्षमताको अस्पताल विस्तार गर्न लागिएको उनको भनाइ थियो । 

मन्त्री पौडेलले दमौली अस्पताललाई ५० शय्यामा स्तरोन्नतिका लागि आफूले पहल गरिरहेको समेत जानकारी दिए । यसका लागि आवश्यक सबै प्रक्रिया पूरा गरेर मन्त्रिपरिषद्मा प्रस्ताव लैजाने उनले बताए । 

त्यस अवसरमा शुक्लागण्डकी नगरपालिकाका प्रमुख कृष्णराज पण्डित, भिमाद नगरपालिकाका प्रमुख दधिराज सुवेदी, म्याग्दे गाउँपालिकाका अध्यक्ष श्रीप्रसाद श्रेष्ठ लगायतले डायलासिस केन्द्र सञ्चालनमा आएपछि मिर्गौला रोगीले सहज रूपमा सेवा पाउने विश्वास व्यक्त गरे । 

डायलासिस केन्द्र स्थापनाका लागि लायन्स क्लब इन्टरनेशनल ३२५ एल नेपालले सहयोग गरेको नेपालका क्याबिनेट सचिव सुजित हिराचनल जानकारी दिए। त्यस्तै केन्द्र सञ्चालनका लागि शुक्लागण्डकी नगरपालिका, भिमाद नगरपालिका र म्याग्दे गाउँपालिकाले आर्थिक सहयोग गरेको छ । 

यस भेगमा डायलासिस केन्द्र नभएकाले मिर्गौलाका बिरामीलाई उपचार लिन दमौली वा अन्यत्रै जानुपर्ने बाध्यता थियो । केन्द्रमा सेवा लिनका लागि ३० जना बिरामीले नाम दर्ता गराइसकेको केन्द्रका कार्यकारी निर्देशक डा रामकुमार श्रेष्ठले जानकारी दिए । उपचार केन्द्रमा सात वटा उपकरण जडान गरिएको छ । 

दक्षिण एसियाकै उत्कृष्ट श्वासप्रश्वास उपचार केन्द्रको रूपमा स्थापना गर्न सरकारले पूर्व प्रधानमन्त्री गिरिजाप्रसाद कोइरालाको नाममा राष्ट्रिय स्तरको श्वासप्रश्वास उपचार केन्द्र स्थापना गर्ने निर्णय गरेको थियो । सोहीअनुसार शुक्लागण्डकी नगरपालिकाको बेलचौतारामा ७४० रोपनी जग्गा उपचार केन्द्रको नाममा प्रदान भइसकेको छ । 

अस्पतालले विशेषज्ञ चिकित्सकबाट हाडजोर्नी तथा नशारोग, जनरल सर्जरी, इन्टरनल मेडिसिन सेवा दिइरहेको छ । अस्पतालमा ओपिडी सेवा, चौबिसै घण्टा इमर्जेन्सी, ल्याब, भिडियो एक्सरे,  सामान्य शल्यक्रियालगायतका सेवा प्रवाह गरिरहेको छ ।