बढी मूल्य लिने मासु पसलमा तालाबन्दी

हुम्ला-  हुम्लाको सदरमुकाम सिमकोटमा सञ्चालित एउटा मासु पसलमा सरोकारवाला निकायले निर्धारण गरेको मूल्यभन्दा बढी रकम असुली गरेको भन्दै अनुगमन टोलीले तालाबन्दी गरेको छ ।

मङ्गलबार दिउँसो जिल्लाको सदरमुकाम सिमकोटमा रहेका मासु पसलहरूको अनुगमन गर्ने क्रममा बजारको कालि चोकमा रहेको रविन्द्र स्वच्छ मासु पसलमा अनुगमन टोलीले तालाबन्दी गरेको उद्योग तथा उपभोक्त हित संरक्षण कार्यालयका प्रमुख हिरा शर्माले बताउनुभयो ।

प्रमुख शर्माका अनुसार यस अघि सरोकारावाला निकायले कुखुराको मासु र खसीको मासुको मूल्य निर्धारण गरिएको थियो । मूल्य निर्धारण अनुसार रविन्द्र स्वच्छ मासु पसलले निर्धारण गरेको रकमभन्दा बढी रकम असुली गरेको आरोप लगाउँदै पसलनै शिल गरिएको हो ।

सिमकोट गाउँपालिका, जिल्ला प्रशासन कार्यालय, उद्योग तथा उपभोक्त हित संरक्षण कार्यालय, उद्योग वाणिज्य सङ्घ हुम्ला, नेपाल पत्रकार महासङ्घ हुम्लालगायतका निकायहरू बसेको बैठकले खसीको मासुको मात्रै एक हजार एक सय र मिस्कट मासुको एक हजार रुपियाँ निर्धारण गरेको थियो ।

तर उक्त पसलको प्रोप्राइटर हरि ऐडीले नेट मासुको दुई सय बढी लिँदै एक हजार तीन सय र मिस्कट मासुको एक सय बढी गर्दै एक हजार एक सय रुपियाँ असुली गरेको सिमकोट गाउँपालिका पशु शाखाका प्रमुख आशिस आचार्यले बताउनुभयो ।

नियम विपरित र उपभोक्तालाई ठगी गरेकै कारण कारबाही गर्नुपर्ने हुँदा पसलमा तालाबन्दी गरिएको प्रमुख आचार्यले बताउनुभयो । सरोकारवाला निकायले गरेको निर्णयको विपरित गरेको आरोपमा आरोपितलाई १० हजार रुपियाँ जरिवाना गर्ने जिल्ला प्रशासन कार्यालय हुम्लाका प्रतिनिधि धनबहादुर रावतले जानकारी दिनुभयो ।

सोही दिन सदरमुकाम सिमकोटभित्रका छ वटा कुखुराको मासु पसल र तीन वटा खसीको मासुपसलमा अनुगमन गरिएको थियो । जसमा नौ वटा मासु पसलबाट किरा परेको र खान लाईक नभएको करिब ६० केजी कुखुराको मासु बरामद गरिएको थियो ।